La segunda selmana de mayu rematóse, per tercer añu, una situación d’aprendizaxe que mos dexó un recuerdu perguapu y unos paisaxes que quiten l’aliendu la boca. Meses de preparación, coordinación y nervios dieron los sos frutos. Gracies al nuestru institutu IBQ, AMPA y families porque confiastis, collaborastis, financiastis y echastis un gabitu pa que pudiéramos vivir esta esperiencia.
Los pasaos díes 13 y 14 de xunu, los escolinos y escolines d’Asturianu y Llatín del IBQ tiramos rumbu a les tierres portugueses de Miranda del Douro, una ciudá fronteriza perguapa y sobre too tranquila. Namás llegar, baxámos pelos Arribes del Duero y nel cruceru pasamos un ratín en paz y equilibriu. Depués, convivimos ente flores y fauna salvaxe y cansaos repostamos nel Albergue xuvenil. Ehí entamaría la nuesa aventura. De la mano de l’asociación de «Lhéngua i Cultura Mirandesa», pasemos dos díes ente cultura, museos, música, mirandés, hestoria viva y muncha «proua», como dicen ellos pa enorguyecese de la so cultura. El segundu día, recibiónos la presidenta de la cámara, Helena Barril, con una cercanía y atención natural n’ella. De siguío, anduvimos ente burrinos, nun entornu onde reinaba la naturaleza y la calma; nel aire, podía respirase’l cariñu y el calorín de la so xente y el cómo nos trataron, más que como foriatos como hermanos. Conviviendo nel institutu coles Paliterires, confirmamos que mos unen munchos llazos y qu’amamos Miranda.
